Clwb dal i fynd

CLWB ‘DAL I FYND’

Yn ystod mis Tachwedd 2005 gwahoddwyd Cyngor Gwynedd i wneud cais am arian grant o Gronfa'r Loteri Fawr. Roedd meini prawf pendant ynghlwm â’r cynllun a nodwyd yn bendant sut fath o brosiectau yr oeddent yn fodlon eu cyllido.

Yn y cyfarfod cyntaf mi roedd cynrychiolwyr o Addysg, Hamdden a Datblygu Chwaraeon yn bresennol. Penderfyniad y gweithgor oedd ceisio gwella iechyd a ffitrwydd bob disgybl cynradd yng Ngwynedd drwy ganolbwyntio ar Weithgareddau / Chwaraeon y Buarth.

Y bwriad oedd defnyddio’r cyllid i greu cynllun i gynnwys holl Ysgolion cynradd Gwynedd (106)

Yn ystod y trafodaethau, fe soniwyd am gynllun 30, 40, 50 milltir (Cymdeithas Athletau Cymru). Fel rhan o beilot i PESS a Campau’r Ddraig fe benderfynwyd marcio trac un lôn ar fuarth Ysgol y Gorlan yn Nhremadog. Mae’r adborth cychwynnol i’r cynllun gan ddisgyblion, athrawon a rhieni’r ysgol yn bositif iawn. Y gobaith nawr drwy arian y grant yw marcio trac tebyg ymhob ysgol gynradd yng Ngwynedd.

Nodwyd serch hynny, bod rhai problemau gyda gweinyddu Cynllun 30, 40, 50, ac felly awgrymwyd bod y Cydlynydd PESS a Swyddog Campau’r Ddraig yn edrych i ehangu a chreu cynllun tebyg yn benodol i Ysgolion Cynradd Gwynedd.

Enw’r cynllun newydd yw “Clwb Dal i Fynd”. Mae’r enw yn awgrymu sawl peth:

ü Dal i fynd drwy gerdded, loncian neu redeg o amgylch y trac heb stopio

ü Y Cynllun yn cychwyn gyda disgyblion Blwyddyn 2 ac yn dal i fynd hyd at flwyddyn 6

ü Targedau penodol i blant gyda nifer o bellteroedd gwahanol – felly mi fydd rhaid ‘dal i fynd’ i gyrraedd y gwahanol bellteroedd. h.y. Cychwyn gyda tharged o 10km hyd at 1000km.

CLWB ‘DAL I FYND’

Y Trac

Mae hyd y trac yn dibynnu ar faint buarth/iard yr ysgol. Yn achos Ysgol Y Gorlan fe ddefnyddiwyd pob twll a chornel o’r buarth er mwyn sicrhau trac 300m. Mae’r trac wedi ei farcio mewn gwahanol liwiau, a bydd marciau yn dangos pellteroedd o 20m, 50m, 100m, 150m, 200m a.y.y.b.

Rheolaeth/Gweinyddiaeth

Bydd y cynllun yn cael ei fonitro gan Gydlynydd PESS â Swyddog Campau’r Ddraig yr awdurdod. Y bwriad yw bod y swyddogion yn ymweld ag ysgolion i sicrhau cefnogaeth, a bod y cynllun yn cael ei redeg yn gyson ac yn gywir.

Alun Jones ( Cydlynydd Pobl Ifanc Egniol Gwynedd )

Lluniau